Dychwelyd at Wledd Conwy!

Yn dilyn llwyddiant stondin Dyfodol yng Ngwledd Conwy yn 2010 (mae’r hanes isod), rydym wedi cael ein gwahodd eto eleni – i stondin fwy!

Rydym yn galw ar ein haelodau – newydd a phrofiadol- i ddod yno am ddiwrnod neu ddau o weithgareddau, arddangos ac ysbrydoli’r cyhoedd i feddwl am eu bwyd!

Ble’n well i wneud hynny na Gwledd Conwy? Pob blwyddyn, mae’r wledd yn arddangos a dathlu cynhyrchwyr a gwerthwyr bwyd lleol. Am fwy o wybodaeth am y wledd, cer i www.conwyfeast.co.uk.

Oes gen ti syniadau am sut i rannu’r neges?

Am ddod i’r Wledd gyda Dyfodol?
Cysyllta gyda gwenlli@dyfodol.org i ddweud dy fod am ymuno â ni, neu edrycha am dudalen Dyfodol ar Facebook.

Gwledd Conwy 2010

Diolch i gefnogaeth ariannol y Co-operative, aeth pobl ifanc o Fforwm Ieuenctid Cymru ar Ddatblygu Cynaladwy (WYFSD)  a Gwerin y Coed i gyflwyno’u syniadau am gynaladwyedd ein bwyd yng Ngwledd Conwy ar y 23ain a 24ain o Hydref 2010. Cawsom leoliad canolog, delfrydol i’n stondin, drws nesaf i’r llwyfan cymunedol, lle cafwyd perfformiadau cerddorol gan nifer o grwpiau a chantorion. Roedd eco-garafan Gwerin y Coed yno, ac yn pweru system sain y llwyfan gyda’i phaneli solar. Hyd yn oed ar ddiwrnod llwyd o Hydref, roedd digon o ynni i gario lleisiau’r perfformwyr ar hyd y maes! Pobl ifanc Gwerin a’r WYFSD fu’n gyfrifol am y paneli solar dros y ddau ddiwrnod, yn sicrhau eu bod yn cael cymaint o oleuni’r haul a phosib.

Cawsom gannoedd o ymwelwyr i’n stondin, a rhoddwyd cipolwg i bawb am ein bwyd a sut gallwn fynd o’i chwmpas hi i newid y modd yr ydym yn ei gael. Crëwyd byrddau gwybodaeth gan aelodau’r WYFSD, gyda phytiau o ffeithiau am fwyd, pecynnu bwyd, gwastraff a milltiroedd bwyd. Cawsom ffermwr organig o ardal Bangor ar ein stondin gyda ‘chydig o’i gynnyrch, a rhoddodd lysiau i ni ar gyfer profi bwydydd.

Profi bwydydd lleol vs. tramor: Moron, tomatos bach, afalau a mêl. Gallwn dyfu’r holl bethau hyn yng Ngwynedd. Serch hynny, gallwn fynd i’r siop a phrynu rhai o bedwar ban byd, gyda miloedd o filltiroedd i’w henwau. Aethom ati i ddarganfod os oedd ymwelwyr Gwledd Conwy yn meddwl fod prynu bwydydd o bell werth y carbon. Drwy ddefnyddio system brosesu data arloesol (papur a ffelt-pen) cawsom ddarlun o farn pobl ifanc, oedolion a phlant rhwng 2-99 mlwydd oed yn cymryd yr her.

Cylchred Ffrwythau (The Fruit Cycle!) Llwyddiant ysgubol oedd y peiriant smŵddi ar gefn beic, gyda’r cyhoedd yn heidio i gael tro ar wneud eu smŵddi gyda chynnyrch tymhorol, Prydeinig a phedalu i droi’r blendar a chael mwynhau allbwn eu gwaith caled!

Pyrsiau a waledi wedi eu hailgylchu: Daeth gwirfoddolwyr newydd o goleg Llandrillo i helpu gyda gweithgareddau, a mwynhau dysgu’r cyhoedd i wneud pyrsiau a waledi allan o hen focys sudd ffrwythau. Roedd staff WYFSD wedi cynorthwyo’r aelodau i ddod o hyd i nifer o hen focsys sudd drwy Freecycle a Facebook, wedi eu glanhau a’u paratoi ar gyfer gwneud pyrsiau.

Mae WYFSD a Gwerin y Coed yn ddiolchgar i’r Co-operative am gefnogi’r prosiect hynod lwyddiannus hwn.